மதிவதனி ஈன்றெடுத்த மணிமுத்தே மரகதமே
எங்கள் அண்ணன் பெற்ற தவப்புதல்வா
மாசறு பொன்னே மண்ணின் மைந்தா
எங்கள் குலதெய்வம் ஆனாயடா நீ
கரிகாலன் பெற்றெடுத்த கற்கண்டே
உன் திருக்கோலம் நாம் கண்டு
இரவு எல்லாம் தூங்கலையே
உன் பார்வை எங்கள் நெஞ்சத்தை
வேல் கொண்டே துளைக்குதடா
வாளாவிருந்து உன்னை உன் அண்ணை
உன் தமக்கை எல்லாம் இழந்தோமோ
என்றேவோர் குற்றவுணர்ச்சி எம்மைக் கொல்லுதடா
கதிர்க்கையன் ஈன்றதோர் ஒளிச்சுடரே
என்றெம்மினம் விடுதலை பெறுமோ
என்றெண்ணி ஏக்கமுறப் பார்த்தாயோ
பக்கத்து தேசத்தில் பதினெட்டுக்கல் தொலைவில்
ஆறுகோடித் தமிழன் இருந்தும்
இப்படி நாம் இன்னல்படுகிறோமே
என்றெண்ணி வருந்தி மனம் நொந்தாயோ
என்செய்வதடா எங்கள் செல்வமே
உன் தந்தையைப் போலோர் மாவீரன்
கொள்கைக் குன்றோர் தலைவன்
ஈங்கிலையே எம்மை வழி நடத்தலையே
ஆனாலும் எங்கள் அண்ணனையே தலைவனாய்
எங்கள் மனங்களிலே வரித்துள்ளோம் வழிநடந்திடுவோம்
காட்டிக் கொடுக்கும் சில கருணாக்கள்
நம்மிடையே வாழ்வதனால் வீழ்ந்திட்டோம்
எங்கள் குலக் கொழுந்தைக் கொன்ற
கோழைகளே மாபாவிகளே காடையர்காள்
வாழவிட்டால் வளர்ந்தே வந்திடுவான்
வரிப்புலியாய் மீண்டும் புறப்படுவான்
என்றெண்ணி அஞ்சிக் கொன்றோரே
கணவனைப் போரினிலே பறி கொடுத்த
மனைவியர் தன்பிள்ளை சிறுவனே
ஆனாலும் தலைவாரிப் பூச்சுடிக்
கையில் வேல்கொடுத்துச் செருக்களம்
சென்றுவா மகனே என்றனுப்பிய
வீரமடா எங்கள் வீரம்
நோயுற்றே சிறார் தான் இறந்தாலும்
மாரில் வாள்கொண்டு கீறியே
மண்ணில் புதைத்த தோர்
மரபடா எங்கள் மரபு
நரவெறி பிடித்த நயவஞ்சகர்களே
எங்கள் பிள்ளையின் எதிர்நின்று
சமர் செய்திருந்தால் உங்களில்
சிலர் தலை கொய்திருப்பான்
மாவீரன் பிள்ளையென நிறுவிச் செத்திருப்பான்
இனவெறி பிடித்த இறுமாப்புக் கொண்டோரே
எங்கள் அண்ணன் நடாத்திய போர்
முடிந்தாலும் எங்கள் பிள்ளைகள்
தங்கள் முன்னோர் வழிநடப்பர்
சார்லஸ் துவாரகா பாலச்சந்திரன் காட்டிப்
பிள்ளைகள் வார்த்தெடுப்போம் வளர்த்திடுவோம்
எங்கள் பிள்ளைகள் ஆயிரமாயிரம்
எங்கள் அண்ணன் பிள்ளைகள்போல்
உருக்கொண்டு மீண்டும் வருவர்
கருணாக்கள் கருவறுக்க உங்களின் வேரறுக்க
வீணர்களே பொறுத்திருங்கள்
பதில் சொல்லக் காத்திருங்கள்
- அன்புமதி
